Cubics

إزاي تخلي دهانات شقتك زي الحرير

هو انك تهتم جدا ببند المحاره ، ولو انتا مش مهندس ، وبتشطب شقتك متقلقش احنا هنشرحلك كل حاجه بالتفصيل وكلامنا اللي جاي موجه ليك

بس قبل ما ندخل في التفاصيل لو حابب تعرف إزاي تبدأ تشطب شقتك لو أنت مش مهندس فممكن تتابع مقالاتنا اللي فاتت و اللي فيها اتكلمنا عن بند السباكة و الكهرباء و المحارة و الدهانات ممكن تشوفها من هنا

بند المحاره

بند المحاره من أصعب البنود في التنفيذ والاستلام . ولكن لو إتعملت صح ، شقتك هتطلع مظبوطه جدا ولو أهملت فيها هتشوف عيوب شقتك بعد ما تخلص ، إزاي يعني ؟ تعالوا نقولكم الحوائط بتاعتنا والاسقف لازم تكون متساوية تماما ومفيهاش أي تعريجات او مطبات … ليه ؟ عشان لما الاضاءه بتضرب في الاسقف او الحوائط سواء إضاءه صناعية زي النجف او اضاءه طبيعية زي ضوء النهار، التعريجات دي بتعمل ضاي للضوء عندها , فلما تبص على السقف هتشوف الضاي, فلازم لو شقتك على الطوب الاحمر متبخلش في بند المحاره ولازم يكون صنايعي ماهر عشان يطلع الشغل مظبوط

طريقة تنفيذ بند المحاره

دلوقتي شقتك على الطوب الأحمر قبل ما بتجيب السباك والكهربائي بتتفق مع مبيض المحاره انه يجي يطرطش الحوائط و البؤج قبل السباكة او الكهرباء ، فلازم ينضف الحوائط والاسقف كويس اوي ولو فيه اي فتحات في الحوائط يسدها ، طل ايه الكلام الغريب دة
هقولك يعني ايه بقي طرطشة ويعني ايه بؤج ، الطرطشة هيا “مونه سايلة” كدة بنسميها “رووبة” وبيبدأ يطرطشها على الحوائط والاسقف بحيث يعمل طبقة خشنة تمسك فيها المحاره في المباني اللي موجودة عشان متفصلش فيما بعد البؤج . . .  ، تخيل كدة لو حيطة كاملة عایز اخليها بسوي واحد اعمل ايه ؟ بنعمل حاجه اسمها بؤجه وديه بتكون عباره عن مستطيل بنعمله علي الحيطة من المونه الاسمنتيه وبنعمل اكتر من واحده جنب بعض رأسيا وأفقيا بحيث أن المسافه بينهم تكون من 3 متر  الي2 متر، مبيض المحاره بيبدأ يظبط “البؤج” ديه على سوا واحد بميزان المياه وبالقدة الألومنيوم يمحر الحيطة ، “البؤج” ديه بتكون الدليل الاسترشادي ليه ، ولما بييجي يبدأ يحرك “القده” وبعد كدا يبدأ في مرحلة الطرطشة والبؤج ، البؤج فايدتها كمان أن الكهربائي يثبت العلب بتاعته بالسوى بتاعها بحيث متكونش بارزه عن الحيطة بعد التشطيب ، بنعمل البوج كمان في الحمامات والمطابخ في حالة المحارة ولزق السيراميك ، وبعد لما بيخلص الكهربائي والسباك أي تركيبات ، بتكلم مبيض المحاره يشتغل بالطريقة ديه لحد مالحيطة تكون على سوي واحد

ملاحظات مهمه جدا

خلي بالك للمبيض ميستخدمش جبس ابدا في الموقع ، خلي بالك ان المبيض هيتحجج ويقولك دة احنا “بنشعر” بس عشان السوك ” الكلام دة مش صح وممكن يظبط السوك من غير جبس بس بتحتاج مجهود شوية ، خلي بالك بقي من حاجه اسمها “التأكيس والزوي”  بنعمله عشان نعالج او لو فيه شطره في المباني