نصائح مهمة في التشطيب

نصائح مهمة في التشطيب

حتنفعك في تشطيب الحمام والمطبخ

● الشياكه في البساطة لو عاوز حمام فندقي يبقي لازم تجيب:

• قاعده معلقة اى ماركة من ايديال ستاندرد، ديورافيت،سيرجمين، وايت فيل
• وحده حوض خشب كونتر معالج مضغوط حوض من ٦٠ إلى ٨٥ سم كحد أقصى
• باب الحمام يكون خشب و لو حمام ضيوف يكون مفصلة

● ممكن تدخل كذا لون في الحوائط المهم التناسق والتوزيع المناسب اعمل تصميم 3D علشان بيسهل عليك تاخد قرار و تشوف الحمام قبل التنفيذ…

● مواسير التغذيه والصرف هات
اكوا ثيرم أو بي ار أو الشريف
وهات الشركه تكبس علشان نطمئن
بس لو ضامن السباك وعندو ماكينه كبس
هو يبقى أفضل 🙋🏻‍♀

● لو هتركب سيراميك أبيض بلاش تركبه بمونة سوداء عشان في أنواع بتتشرب اللون وبتغير لونها

● متركبش الأرضيات سيراميك مط علشان حيتعب المدام ومبيبنش فيه نضافة

● لو حتركب سيراميك بلاطات كبيرة مثل ٣٠×٩٠ او ٦٠×١٢٠
أو مقاسات صغيرة جدا لازم تمحر الحوائط الاول

● لو معاك فلوس كتير متعملش بورسلين في حوائط للحمام
ركب رخام حتي لو جانب واحد وارضية جرانيت.

● لو مش حتركب چاكوزي اعمل شاور رووم، البانيو العادي مالوش لازمه غير في غسيل السجاد 🤷🏽‍♀ والشتوى

● كابينة شاور الحمام الزجاج السيكيوريت أشيك من الأكريليك. ياريت تركب مسند يد ومكان للجلوس لو الشاور اكبر من ١ متر عرض × ١.٥ طول

● مراية الحمام لازم تكون حاجه شيك جدا علشان دي اللي حتنور وتديك انطباع دايم .. ✨

● السخانات الفورية هي أفضل وآآمن أنواع السخانات ومش بتستهلك كهرباء كتير زي ماهو شائع عنها، بشرط يكون ماركة محترمة مثل كلاج المانى ويتم تأسيس الكهرباء ليها وفقاً لمواصفات الشركة المنتجة… والسخانات الفورية الغاز ممتازة جدااا.

● لو عندك ڤيلا ركب سخان شمسي أو غلايه غاز أفضل بكثير…

● أركان الحمامات وحول الأجهزة الصحية والتقفيل حول البانيو استخدم فيهم مادة مليء فواصل جاهزة أفضل 1000 مرة من الأسمنت الأبيض أو السليكون

● بالنسبه الخزانات الدفن منتجات جروهي الأفضل و٩٠ بالمائة من السباكين عارفين تركيبة و واخدين عليه حاجات كتير تانيه كويسه….
منهم جيبريت يفضل يتركب عن طريق. الشركة نفسها او روكا

● لو هتعمل تعديلات وتهد حوائط بلاش بالمرزبة عشان
الحوائط هتنمل، النحات يستخدم هيلتي التكسير أو المطرقة افضل وتحافظ على قوة الحيطة.

● لو هتكمل على حيطة مبنية قبل كدة، هد الحيطة كلها وابنيها مرة أو اربط الحيطتين بكانات حديد

● لو حتعملي دواليب كتير في المطبخ متركبهوش سيراميك اعمل الجزء اللي باين مابين الوحدات العلوية و السفلية جرانيت او بورسلين رخامى او اونكس ٦٠×١٢٠داير بمحيط المطبخ.

● القاعدة المعلقة هتستحمل ومش هتقع ماتخافش (بتشيل لحد وزن 400 كجم)

● السيفون المدفون بيتعمله صيانة عادي على فكرة ومش بيتخاف منه وده الجديد.

● ركب أرضيات واستنى من أسبوعين لـ 3 أسابيع قبل ماتبدأ معجون حوائط

● البورسلين مابيركبش بمونة.. البورسلين مابيركبش بمونة بتركب بمادة لاصقة بعد المحارة سواء أرضية او حوائط (شغل بره)

● اوعى تركب بورسلين بدون فواصل 2 مم او 1.5 مللى على الأقل

● علشان تركب بورسلين في الأرضية لازم الصنايعي يدرع الأرضية الأول وبعد كده يركب بمادة لاصقة

● اللي نعرفه أحسن من اللي مانعرفوش ده لما تيجي ترتبط حضرتك إنما في التشطيب ممكن يبقى اللي ماتعرفوش أحسن من اللي تعرفه.

● وسع باب المطبخ على قد ما تقدر عشان التهوية وسهولة الدخول والخروج بالذات لما يكون عندك ثلاجة كبيرة ٣ باب وعريضة

● ممكن تلزق سيراميك جديد على سيراميك قديم عادي ومش هيفك بمادة سوبر مالتى اللى بتلصق بيها حمام السباحة شديدة اللزوجة.

● أي رخام بيتنضف بمية فقط بدون أي صابون أو مواد كيماوية كل ٥ سنوات اجليه

● صور مسارات السباكة والكهرباء واحتفظ بيها فى مكان أو ايميلك عشان لو حبيت تخرم في الحوائط بعد كدة

● لو مضطر تدفع عربون لأى لحد ماتعرفوش خد صورة بطاقته ومضيه على إيصال دي ماتزعلش إلا لو هو ناوي ينصب عليك

● اختار الأجهزة الكهربائية قبل ما تفصل المطبخ عشان المقاسات تظبط

● في شفاطات صغيرة قطرها 10 سم ،15/18بس وقدرة شفطها عالية وما بتعملش أي صوت، لو فلوسك تسمح هاتها

● الشفاط ممكن تركبه في السقف لو عامل سقف ساقط

● كبر شباك المطبخ صغر شباك الحمام

● اعمل بريزة فوق حوض الحمام

● ارضيه الشاور روم لازم تتعمل رخام أو ازمالدو وبيركب بميول كويسه علشان ميركنش مياه

● مش كل حاجة تشوفها على النت لما تنفذها هتعجبك زي الشرا أونلاين بالظبط

● اللي يقولك عزل الحمام مالوش لازمة قوله شكراً للنصيحة بعد ماتقوله شكراً اعزل الحمام برضه

● لما تعزل الحمام اعزل 30 سم على الأقل من أسفل الحوائط

● ماتخليش الصنايعية يخمروا المونة جنب الحوائط أبدا متنساش اهم حاجه في البيت الحمام والمطبخ…. بالنسبه لأسعار المصنعيات تختلف من صنايعي للتاني المهم تجيب حد خبرة وثقة حتي لو سعره غالي شويه علشان متخسرش كتير ولو مش واثق فيه متشغلهوش ! علشان مفيش شغل من غير ثقه .